Program for Open dag:
- Velkomst og kort presentasjon av lektorutdanninga ved Universitetet i Bergen.
- Kort orientering om praksis i lektorutdanninga.
- Lektorstudentar frå alle lektorprogramma fortel frå studiekvardagen, både fagleg og sosialt, og om sine erfaringar frå praksis i skulen.
- Omvising på aktuelle delar av universitetsområdet.
Arrangementet er i fellesskap med dei fire andre lektorprogramma ved UiB.
Om studiet
Som lektor kan du undervise på ungdomstrinnet og i den vidaregåande skolen.
Historie er faget om fortida til menneska og om samhandling og konflikt i ulike samfunn frå antikken til i dag, lokalt, nasjonalt og globalt. I historiefaget går vi i djupna på kva som skjedde og kvifor. Her lærer du om alt frå krig og konflikt, til kvardagsliv og tankesett, og om korleis fortida formar oss den dag i dag.
Religionsvitskap er studiet av religion i alle deler av verda, til alle tider. Den amerikanske presidenten ber Gud om å velsigne USA. Kvifor? Dei gamle egyptarane mumifiserte sine døde. Kvifor? Vert menneska mindre religiøse, eller meir? Religiøse førestellingar og praksisar har prega, og pregar fortsatt, menneska både som individ, så vel som samfunn. Religionsvitskap er faget der du lærer om dette.
Gjennom studium og praksis får du undervisningskompetanse i to fag:
- Det eine undervisningsfaget tar du master i, enten historie eller religionsvitskap. Begge faga er sentrale skulefag og undervisning i desse faga gir elevane oversikt og innsikt i menneska sine liv frå tidlege tider og fram til i dag.
- Det andre undervisningsfaget kan vere enten engelsk, fransk, tysk, spansk, historie, religionsvitskap eller sosiologi.
Du får eit solid grunnlag i begge undervisningsfaga og lærer kritisk refleksjon rundt fag, undervisning og læring.
I tillegg inneheld studiet 30 sp pedagogikk (korleis vi lærer bort og oppdrar), 30 sp fagdidaktikk (djupare refleksjon kring faget og korleis vi underviser fag) og 100 dagar praksis i ungdom- og vidaregåande skole.
Du kan reise på utveksling i fjerde eller sjette semester.
