Det er eit stort behov for gode norsklærarar i skulen. Den gode norsklæraren spreier lese- og skriveglede og får elevane til å sjå samanhengar mellom språk og samfunn.
Program for Open dag:
- Velkomst og kort presentasjon av lektorutdanninga ved Universitetet i Bergen.
- Kort orientering om praksis i lektorutdanninga.
- Lektorstudentar frå alle lektorprogramma fortel frå studiekvardagen, både fagleg og sosialt, og om sine erfaringar frå praksis i skulen.
- Omvising på aktuelle delar av universitetsområdet.
Arrangementet er i fellesskap med dei fire andre lektorprogramma ved UiB
Om studiet
Som lektorutdanna ved UiB får du solid fagleg tyngde.
Tilnærminga til undervisning er reflektert og innovativ og med praksis som del av studiet får du god skoleerfaring allereie frå første semester.
I studiet lærer du om korleis dei nordiske språka har utvikla seg, om moderne norsk språk, og teori om ulike språklege fenomen. I andrespråksopplæringa ser vi for eksempel på korleis innvandrarar med ulike morsmål lærer seg norsk. I litteraturundervisninga får du djupare innsikt i norsk og nordisk tekstkultur, du studerer norsk litteratur før og etter 1900 og du møter sentrale forfattarskap og ulike sjangrar.
Fagområdet diskuterer spørsmål som:
- Kva vil det seie å skrive godt?
- Korleis bruker vi språk i ulike situasjonar?
- Korleis kan litterære tekstar spegle den verda vi lever i?
Gjennom studiet får du undervisningskompetanse i to fag:
- Du skriv masteroppgåve i norsk.
- Det andre undervisningsfaget kan vere enten engelsk, fransk, tysk, spansk, historie, religionsvitskap eller sosiologi.
Du får eit solid grunnlag i begge undervisningsfaga, som er sentrale skulefag, og lærer kritisk refleksjon rundt fag, undervisning og læring.
I tillegg inneheld studiet 30 studiepoeng pedagogikk (korleis vi lærer bort og oppdrar), 30 studiepoeng fagdidaktikk (djupare refleksjon kring faget og korleis vi underviser fag) og 100 dagar praksis i ungdom- og vidaregåande skule.
Du kan reise på utveksling i sjette semester.
